AITIA – Institut étatique d’aide à l’enfance et à la jeunesse ass eng Verwaltung ënner dem Ministère fir Educatioun, Kanner a Jugend. Seng Missiounen am Beräich vum Kannerschutz ëmfaassen d’sozialpedagogesch Betreiung, d’Wunnstrukturen an d’Präventioun souwéi déi sozial Begleedung vu Kanner a Jonker am Alter vu 0 bis 18 Joer an doriwwer eraus.
AITIA geréiert Dages- a Nuetsstrukturë fir Kanner a Jugendlecher: aacht Foyerën, ee Service fir betreit Wunnen am oppene Milieu an ee psychosozialen Déngscht. Des Strukture sinn zu Schëffleng, Diddeleng a Biwels.
Aktuell (Stand: 30.9.2025) betreit AITIA 61 Kanner a Jugendlecher an hire Strukturen.
D’Institutioun bitt och Hëllefs- a Begleedungsservicer fir Famillen a Kanner, déi a Situatioune liewen, déi hir Entwécklung oder hiert Wuelbefanne kënne gefäerden.
De Service „Treff-Punkt” bitt Strukturen, wou Kanner hir Eltere kënne gesinn, wann d’Ëmgangsrecht verbueden, blockéiert oder erschwéiert ass – an Zäite wou d’Kanner an enger Institutioun, bei enger Fleegefamill oder bei engem getrennten oder gescheeten Elterendeel liewen. Ugebueder gëtt och den Encadrement an d’Organisatioun vu Prisongsvisiten.
Dës Servicer sinn zu Mënsbech, an der Stad (Verluerekascht), zu Schëffleng, Bieles, Déifferdeng a Wahlhausen ze fannen.
De Service „Espace rencontre protégé” bitt e séchere Raum fir Kanner, déi häuslech Gewalt erlieft hunn, fir d’Bezéiung zum Elterendeel, dee Gewalt ausgeüübt huet, nees kënnen opzebauen oder ze erhalen.
Een Haaptzil vum AITIA ass et, d’Qualitéit vun der professioneller Begleedung fortlafend weiderz’entwéckelen an dauerhaft an de Strukturen ze verankeren.
D’Qualitéitsstandarden, déi ëmgesat goufen, an déi proposéierte Verbesserungsberäicher zielen drop of, d’Begleedung vun de Kanner a Familljen dauernd z’optiméieren.