Den Observatoire national de l'enfance, de la jeunesse et de la qualité scolaire (OEJQS) krut déi follgend Aufgaben zougedeelt:
- d’Situatioun vun de Kanner a Jugendlechen zu Lëtzebuerg ze analyséieren, dëst am Kader vun enger globaler Approche, déi d’Kand oder de Jugendlechen an de Mëttelpunkt stellt an op de Rechter vum Kand baséiert;
- d’Systemer ze evaluéieren, déi op si awierken a prioritär dem sozio-pedagogesche Beräich oder anere Beräicher vun der Kanner- a Jugendaarbecht zouzeuerdne sinn;
- d’Qualitéit vum Enseignement am Bildungswiese systeemesch ze bewäerten, fir d’Entwécklung vun der schoulescher Qualitéit zu Lëtzebuerg ze fërderen.
Den Observatoire schafft komplett onofhängeg a Bezuch op seng Beobachtungsinstrumenter, Feststellungen a Recommandatiounen. De Minister bestëmmt all Joer op der Basis vun de Propositioune vum Observatoire déi Beräicher, déi prioritär sinn.
Wichtegst Moossnamen
Fir dës Aufgaben ze erfëllen:
- dréit a faasst den Observatoire déi bestoend Donnéeën iwwer d’Kandheet an d’Jugend zu Lëtzebuerg zesummen;
- analyséiert en d’Etüden an d’Resultater vun den nationalen oder regionalen Evaluatiounen am Beräich vun der Bildung a vun der Situatioun vun de Kanner, genee ewéi déi international Etüden iwwer Lëtzebuerg;
- realiséiert, initiéiert, preparéiert oder koordinéiert en Ëmfroen, Analysen an Etüden a gëtt Stellungnamen zu verschiddenen Aspekter vun de Kanner a Jugendlechen an zu der schoulescher Qualitéit zu Lëtzebuerg of;
- analyséiert an evaluéiert e Fakten iwwer d’Situatioun vun de Kanner a Jugendlechen zu Lëtzebuerg an iwwer d’Systemer, déi op si awierken, andeem e se mat der entspriechender Fuerschung, Praxis a Politik op nationalem an internationalem Plang a Verbindung bréngt an e Suivi op nationalem Plang ariicht;
- analyséiert en d’Organisatioun an de Fonctionnement vun de Schoulen, hiren Direktiounen an de Servicer aus dem Departement vum Minister, déi sech mat der Bildung befaassen;
- begéint en, op der Basis vun de festgeluechte Prioritéiten, Kanner a Jugendlecher, Elteren, Professioneller aus dem sozio-pedagogesche Beräich, d’Direktioune vun Institutiounen, national Vertriedunge vu Jugendlechen, Elteren, Schüler, Studenten, Enseignanten a Vertrieder vu Gemengen a Ministèren, Fuerscher, genee ewéi d’Beruffschamberen.
Ëffentlech Berichter
Den Observatoire verëffentlecht all Joer e Rapport d’activités genee wéi thematesch Berichter an all fënnef Joer en nationale Bericht iwwer de Schoulsystem an en nationale Bericht iwwer d’Entwécklung vun der Situatioun vun de Kanner a Jugendlechen zu Lëtzebuerg.