Glossaire

D’Assistente fir Schüler mat spezifesche Besoinen (assistants pour élèves à besoins éducatifs spécifiques, A-EBS) ënnerstëtzen déi spezialiséiert Enseignantë fir Schüler mat spezifesche Besoinen (instituteurs spécialisés dans la scolarisation des élèves à besoins éducatifs spécifiques, I-EBS) bei hire Missiounen. Si kënnen de betraffene Schüler bei alldeegleche Gesten hëllefen an esou dozou bäidroen, datt d’Schüler op alle méigleche Plazen u schouleschen Aktivitéiten deelhuele kënnen.

D’Ateliere fir spezifescht Léieren (ateliers d’apprentissage spécifiques) ergänzen den Enseignement am reguläre Schoulsystem. Se ginn entweeder wärend oder ausserhalb vun de reguläre Schoulzäiten an enger vun den dezentraliséierten Annexe vun engem Kompetenzzentrum oder an enger Schoul oder engem Lycée oder op enger anerer adaptéierter Plaz organiséiert. Duerch dës Ateliere regruppéieren d’Kompetenzzentere Schüler, déi änlech Besoinen hunn. Si bidde geziilt Aktivitéiten un, déi d’Verstäerkung vu spezifesche Kompetenzen, z. B. wat d’Siicht, d’Sprooch, d’Gehéier oder eng Héichbegabung ugeet, erméiglechen.

D’Commission des aménagements raisonnables (CAR) bestëmmt, wéi eng räsonabel Amenagementer accordéiert ginn, fir d’Léierëmfeld un d’Besoine vum Schüler unzepassen.

D’Inklusiounskommissioun (commission d’inclusion, CI) vum Lycée kann heifir, mam schrëftlechen Accord vun den Elteren oder dem groussjärege Schüler, unhand vun engem Dossier eng motivéiert Demande areechen. Och d’Elteren oder de groussjärege Schüler kënnen eng motivéiert Demande areechen.

D’Commission nationale d’inclusion (CNI) intervenéiert um nationalen Niveau. Hir Aufgab ass et, d’Ufroe fir eng Fachbetreiung vun engem Schüler mat spezifesche Besoinen ze traitéieren. Déi national Inklusiounskommissioun intervenéiert normalerweis op Ufro vun den Elteren oder dem groussjärege Schüler, vun engem unerkannte psychosoziale Service oder vum Hausdokter vum Schüler oder op Basis vun engem Dossier, dee vun enger Inklusiounskommissioun (commission d’inclusion, CI) agereecht gouf, ënner der Bedingung, datt d’Elteren oder de groussjärege Schüler domat averstane sinn.

Dacks beoptraagt d’CNI dann een oder méi Kompetenzzenteren, fir eng spezialiséiert Diagnos ze maachen.

D’Ekippe fir d’Ënnerstëtzung vu Kanner mat spezifesche Besoinen (équipes de soutien des élèves à besoins éducatifs spécifiques, ESEB) intervenéieren entweeder um Niveau vun de Regionaldirektioune vun der Grondschoul oder um Niveau vun de Lycéeën. Si beroden d’Enseignantë bei der direkter Betreiung vu Schüler mat spezifesche Besoinen a kënnen och fir ambulant Betreiungen ewéi Ënnerstëtzungsmesüren an der Klass suergen. Si kënnen eng éischt Diagnos maachen, zesumme mat de betraffenen Enseignanten, an d’Betreiung vun de Schüler sécherstellen, wann d’Inklusiounskommissioun (commission d’inclusion, CI) Moossnamen decidéiert huet.

Eng Fachbetreiung kann op verschidde Niveaue stattfannen:

• ausschliisslech an enger Grondschoul, engem Lycée oder an engem Kompetenzzentrum oder
• gläichzäiteg a complementaire an enger Grondschoul, engem Lycée an an engem Kompetenzzentrum.

Dës ka stattfannen am Kader vun:

• enger spezialiséierter Klass an engem Zentrum,
• enger ambulanter Betreiung (intervention spécialisée ambulatoire, ISA),
• enger Reeducatioun an enger Therapiesëtzung,
• engem Atelier fir spezifescht Léieren.

D’Inklusiounskommissiounen (commissions d’inclusion, CI), déi de Grondschouldirektiounen zougewise sinn, kënnen een individualiséierte Betreiungsplang (plan de prise en charge individualisé, PPCI) fir all Schüler mat spezifesche Besoinen ausschaffen. Esou e Plang kann divers Ënnerstëtzungsmoossname virgesinn; ë. a. d’Upassung vum Unterrecht, eng Ënnerstëtzung am Unterrecht vun externem Fachpersonal oder en zäitweilege Besuch vum Schüler vun enger anerer wéi senger normaler Klass. D’Eltere mussen deem Plang zoustëmmen.

D’Inklusiounskommissioun (commission d’inclusion, CI) vun engem Lycée kann een individualiséierte Bildungsplang (plan de formation individualisé, PFI) proposéieren. Si identifizéiert esou d’Fächer an d’Kompetenzen, déi de Fäegkeete vum Schüler mat spezifesche Besoinen entspriechen, an adaptéiert de Schoulrhythmus deementspriechend. D’Elteren oder de groussjärege Schüler mussen dem proposéierte PFI zoustëmmen.

D’Fachpersonal vun de Kompetenzzentere schafft fir all Schüler mat spezifesche Besoinen, dee betreit gëtt, een individualiséierte Fërderplang (plan éducatif individualisé, PEI) aus. Dës Pläng orientéieren sech un de reguläre Schoulprogrammer vun der Grondschoul an dem Lycée. Se sinn un déi besonnesch Besoine vun all betreitem Schüler ugepasst.

D’Inklusiounskommissiounen (commissions d’inclusion, CI) vun all regionaler Grondschouldirektioun hunn als Aufgab, d’Elteren iwwer déi verschidde Betreiungsmoossnamen, déi proposéiert ginn, ze informéieren an ënner Ëmstänn déi jeeweils gëeegent Moossname fir de Schüler ze bestëmmen. Dës Moossname ginn dann am Schüler sengem individualiséierte Betreiungsplang (plan de prise en charge individualisé, PPCI), dee vun der CI zesumme mat den Elteren ugeholl gëtt, festgehalen. D’CI iwwerwaacht d’Ëmsetzung vum PPCI an evaluéiert dësen all Joer, fir d’Upassunge virzehuelen, déi fir de schoulesche Fortschrëtt vum Schüler néideg sinn. D’CI leet eng Bezuchspersoun fir all Schüler fest. Dës Persoun ass den Uspriechpartner fir de Schüler a seng Elteren.

D’CI ka sech mam Averständnes vun den Elteren och un d’Commission nationale d’inclusion (CNI) wenden. D’Eltere kënnen awer och direkt d’CNI kontaktéieren.

D’Inklusiounskommissioun (commission d’inclusion, CI) vum Lycée huet als Aufgab, d’Schüler an d’Elteren iwwer déi verschidde Betreiungsmoossnamen, déi proposéiert ginn, ze informéieren an ënner Ëmstänn déi jeeweils gëeegent Moossname fir de Schüler ze bestëmmen. Dës Moossname ginn dann am Schüler sengem individualiséierten (Aus-)Bildungsplang (plan de formation individualisé, PFI), dee vun der CI zesumme mam Schüler a mat den Elteren ugeholl gëtt, festgehalen. D’CI iwwerwaacht d’Ëmsetzung vum PFI an evaluéiert dësen all Joer, fir d’Upassunge virzehuelen, déi fir de schoulesche Fortschrëtt vum Schüler néideg sinn. Ënner der Konditioun, datt d’Elteren oder de groussjärege Schüler hiren Accord ginn hunn, kann d’CI d’Commission des aménagements raisonnables (CAR) mat abezéien, wa si der Meenung ass, datt räsonabel Amenagementer fir de Schüler noutwendeg sinn.

D’CI ka sech mam Averständnes vun den Elteren och un d’Commission nationale d’inclusion (CNI) wenden. De groussjärege Schüler oder d’Eltere kënnen awer och direkt d’CNI kontaktéieren.

D’spezialiséiert psychopedagogesch Kompetenzzenteren (centres de compétences en psychopédagogie spécialisée) sinn Ariichtungen, déi de Schüler mat spezifesche Besoinen eng spezialiséiert Ënnerstëtzung bidden am Kader vun der schoulescher Offer an de Grondschoulen an an de Lycéeën. Dës Kompetenzzentere bidden ënner anerem:

• eng spezialiséiert Diagnos;
• eng Berodung fir d’Léierpersonal oder dem Schüler säin Ëmfeld (Famill, Klass, asw.);
• eng spezialiséiert ambulant Interventioun am Unterrecht vun enger regulärer Klass;
• eng spezialiséiert Scolarisatioun an enger Klass vun engem Kompetenzzentrum.

Zu Lëtzebuerg ginn et aacht Kompetenzzenteren an eng Agence:

• Centre de logopédie (CL);
• Centre pour le développement des compétences relatives à la vue (CDV);
• Centre pour le développement socio-émotionnel (CDSE);
• Centre pour le développement des apprentissages « Grande-Duchesse Maria Teresa » (CDA);
• Centre pour le développement moteur (CDM);
• Centre pour le développement intellectuel (CDI);
• Centre pour enfants et jeunes présentant un trouble du spectre de l’autisme (CTSA);
• Centre pour enfants et jeunes à haut potentiel (CEJHP);
• Agence pour la transition vers une vie autonome (ATVA).

Kompetenzzentren: Annuaire

Räsonabel Amenagementer (aménagements raisonnables) si besonnesch Moossnamen, déi dem Schüler geneemegt ginn. Dës erméiglechen d’Upassung vun de Léier- an Evaluatiounsmodalitéiten un déi spezifesch Besoine vum Schüler. Si erméiglechen dem Schüler, sech d’Matière méi einfach unzëeegnen a besser Resultater an de Prüfungen ze kréien. Dorënner versteet een z. B. d’Ariichtung vum Klassesall, eng méi adaptéiert Presentatioun vun de Questionnairen, méi Zäit bei de Prüfungen oder den Asaz vun technologeschen Hëllefsmëttel, fir d’Schwächten ze kompenséieren.

D’Inklusioun vu Kanner a Jugendleche mat spezifesche Besoinen ass eng Prioritéit fir d’Lëtzebuerger Regierung. Dës kann a verschidde Beräicher stattfannen, ë. a.:

• Enseignement a Weiderbildung (Grondschoul, Lycée, Beruffsausbildung, Universitéit, Museksunterrecht, Erwuessenebildung);
• Bildungs- a Betreiungsstrukturen (Crèchen oder Maison-relaisen);
• Jugendaktivitéiten (Jugendhaiser, Vakanz- a Fräizäitaktivitéiten).

Déi ënnerschiddlech proposéiert Ënnerstëtzungsmoossname fir Schüler mat spezifesche Besoine sollen an éischter Linn de Schüler erméiglechen, um regulären Unterrecht an hirer Grondschoul- oder Lycéesklass deelzehuelen. Wann e Schüler mat spezifesche Besoinen eng Klass vun engem Kompetenzzentrum oder vun enger Bildungsariichtung am Ausland besicht, bleift en a senger regulärer Klass a senger Schoul ageschriwwen.

Schüler mat spezifesche Besoinen (élève à besoins éducatifs spécifiques, EBS) si Kanner oder Jugendlecher, déi no internationale Klassifikatiounen Defiziter oder Schwieregkeeten hunn oder däitlech méi Léierprobleemer hunn wéi d’Majoritéit vun de Kanner oder Jugendlechen am selwechten Alter. Als EBS ginn och Kanner oder Schüler mat enger Héichbegabung ugesinn, déi eng spezialiséiert Betreiung brauchen, fir hir Fähegkeeten oder hiert Potenzial maximal auszenotzen.

D’Betreiung vun engem EBS kann net mat deene Mëttelen, déi dem Enseignant normalerweis zur Verfügung stinn, assuréiert ginn. Hie kann Ënnerstëtzungsmoossnamen oder eng Fachbetreiung geneemegt kréien, am Zesummenhang mat sengen individuelle Besoinen. Dem Schüler seng spezifesch Besoine kënnen ze dinn hu mat der Motorik, mat visuellen oder sproochleche Problemer oder Problemer mam Gehéier, der kognitiver Entwécklung oder dem Verhalen.

De Service national de l’éducation inclusive (SNEI) huet d’Missioun, déi inklusiv Educatioun ze promouvéieren an d’Qualitéit vum Ënnerstëtzungssystem vu Schüler mat spezifesche Besoine sécherzestellen. Hien ersetzt de fréiere Service de la scolarisation des élèves à besoins spécifiques (S-EBS).

D’spezialiséiert ambulant Interventioun (intervention spécialisée ambulatoire, ISA) gëtt vun de Kompetenzzenteren assuréiert an ass fir Schüler mat spezifische Besoine geduecht. Dës fënnt an enger regulärer Grondschoul- oder Lycéesklass statt, zousätzlech zu den an de Grondschoulen oder Lycéeën ëmgesate Moossnamen. D’Fachpersonal vun de Kompetenzzentere schafft an enker Zesummenaarbecht mam Léierpersonal aus de Schoulen an de Lycéeën.

D’spezialiséiert Diagnos (diagnostic spécialisé) erméiglecht eng präzis Identifizéierung vum Schüler senge spezifesche Besoinen an d’Ausschaffe vun den entspriechenden adaptéierte Moossnamen. Déi spezialiséiert Diagnose gi vun de spezialiséierte psychopedagogesche Kompetenzzenteren duerchgefouert.

D’spezialiséiert Enseignantë fir Schüler mat spezifesche Besoinen (instituteurs spécialisés dans la scolarisation des élèves à besoins éducatifs spécifiques, I-EBS) ginn direkt de Grondschoulen zougewisen. Si si soumat déi éischt Uspriechpartner tëschent Schüler mat spezifesche Besoinen, hiren Elteren, den Enseignantë vun der Klass an de pedagogeschen Ekippen. Si ënnerstëtzen d’Schüler direkt am Unterrecht a schaffen enk mat de Membere vun den Ekippe fir d’Ënnerstëtzung vu Schüler mat spezifesche Besoinen (équipes de soutien des élèves à besoins éducatifs spécifiques, ESEB) an den Inklusiounskommissiounen (commissions d’inclusion, CI) zesummen.

Fir eng spezialiséiert Betreiung an enger Klass vun engem Kompetenzzentrum besicht de Schüler mat spezifesche Besoine eng spezialiséiert Klass an engem Kompetenzzentrum oder gläichzäiteg a complementaire dozou den Unterrecht an enger regulärer Grondschoul- oder Lycéesklass an an engem Kompetenzzentrum.