De Centre national de formation professionnelle continue (CNFPC) ass en oppene Formatiounszentrum, deen duerch d’Zesummeliewe vu Salariéen, Demandeurs d’emploi, der breeder Ëffentlechkeet a jonken Erwuessenen, genee ewéi dank den enke Verbindunge mat Experten an Entreprisen an der Zesummenaarbecht mat der ADEM fest an der Aarbechtswelt verankert ass. Qualifizéiert Beruffsausbilder vermëttelen hei opgrond vun hirer Erfarung d’Realitéit vum Terrain a bidden eng personaliséiert Begleedung un.
Am CNFPC gi véier Formatiounsachse proposéiert:
- Berufflech Weiderbildung: Formatiounen, déi et Salariéen a Selbstännegen erlaben, sech Kenntnesser unzëeegnen, se ze erhalen oder ze erweideren a se u gesellschaftlech an technologesch Ufuerderungen unzepassen;
- Berufflech Ëmschoulung: Formatioune fir Leit, déi eng Aarbecht sichen a fir Persounen, déi sech berufflech ëmorientéiere wëllen, an Zesummenaarbecht mat der ADEM;
- Coursë fir d’perséinlech Weiderentwécklung: Dës Formatioune riichte sech un Erwuessener, déi sech a verschiddene Beräicher aschaffen oder perfektionéiere wëllen;
- Schoulesch Offer: Coursen, déi zum formelle Bildungssystem gehéieren, fir Jonker (Éischtausbildung) an Erwuessener (Erwuessenebildung).
De CNFPC, en ëffentlechen Organismus, deen dem Service de la formation professionnelle vum Ministère fir Educatioun, Kanner a Jugend (MENJE) ënnerstallt ass, ass zanter ronn 40 Joer aktiv.
De CNFPC ass op e puer Standuerter ze fannen:
- de CNFPC Esch-Uelzecht, mat de Sitte Sommet, Belval, Terres Rouges a Stroossen;
- de CNFPC Ettelbréck, mat de Sitten Ettelbréck a Colmer-Bierg.
De CNFPC verfüügt iwwer eng breet Infrastruktur an huet sech op déi follgend Beräicher spezialiséiert:
- Essential Skills (digital Kompetenzen) a Soft Skills (Industrie / Automatiséierung / KNX);
- Forstwirtschaft an Ëmwelt;
- Schweessen; séchert Bedreiwe vu Maschinnen.