Wien d’Lëtzebuerger Nationalitéit wëll kréien, muss Lëtzebuergesch kënnen. Duerfir ginn et Coursen, déi mat engem Examen ofgeschloss ginn.
Wie gär d’Lëtzebuerger Nationalitéit hätt, muss de „Sproochentest“ fir Lëtzebuergesch am Institut national des langues Luxembourg (INLL) maachen. D’Lëtzebuergeschcoursë vum INLL an d’Lëtzebuergeschcoursen, déi de Service de la formation des adultes a seng Partner organiséieren, bereeden op dësen Exame vir, deen den Niveau A2 am Mëndlechen a den Niveau B1 am Héierverstoen erfuerdert. Fir weider Informatiounen:
- Internetsite: www.inll.lu
- Tel.: (+352) 26 44 30 1
Fir d’Lëtzebuerger Nationalitéit ze kréien, muss een de Certificat „Vivre ensemble au Grand-Duché de Luxembourg“ virweisen. De Certificat gëtt vum Service de la formation des adultes fir déi Leit ausgestallt, déi un dësem Cours vu 24 Stonnen deelgeholl oder en Examen zu dësem Cours gemaach hunn.
D’Coursen an den Examen zu Vivre ensemble au Grand-Duché de Luxembourg op Lëtzebuergesch, Däitsch, Franséisch oder Englesch befaassen sech mat dësen Themen:
- d’Grondrechter vun de Bierger (6 Stonne Cours – 10 Froen);
- staatlech a kommunal Institutioune vum Grand-Duché (12 Stonne Cours – 20 Froen);
- d’Geschicht vum Lëtzebuerger Land an d’europäesch Integratioun (6 Stonne Cours – 10 Froen).
Den Examen gëtt um Computer gemaach a besteet aus Multiple-Choice-Froen. Den Exame gëtt um Kierchbierg organiséiert; d’Coursë sinn zu Lëtzebuerg-Stad, Lëtzebuerg-Kierchbierg, Esch/Uelzecht an Dikrech.
- Online-Aschreiwung
- E-Mail: sfa@men.lu
Persounen, déi säit méi wéi 20 Joer legal zu Lëtzebuerg wunnen, kënnen ënner bestëmmte Konditioune vum Sproochentest an och vum Examen zum Cours Vivre ensemble au Grand-Duché de Luxembourg befreit ginn.
Geméiss Artikel 28 vun der Loi modifiée du 8 mars 2017 sur la nationalité luxembourgeoise mussen dës Persounen obligatoresch op mannst 24 Stonne Coursen an der lëtzebuergescher Sprooch besichen. Dës Coursen hunn zum Zil, eng Aféierung an d’Lëtzebuergesch am mündlechen Ausdrock a beim Verstoen ze ginn.
Et ass wichteg, datt dës Coursen am Kader vun engem vum Minister fir Educatioun, Kanner a Jugend autoriséierte Programm stattfannen. D’Course ginn entweder vum Service de la formation des adultes oder vun zertifizéierte Prestataire gehalen, déi iwwer déi entspriechend ministeriell Zoustëmmung fir dëse Sprooche-Programm verfügen.
Déi betraffe Coursen droen explizit déi follgend Bemierkung:
« Cours visant à offrir une initiation à la langue luxembourgeoise en expression orale et en compréhension de l’oral, conformément à l’article 28 de la loi modifiée du 8 mars 2017 sur la nationalité luxembourgeoise »
Et gëtt de betraffene Persoune recommandéiert, sécherzestellen, datt de gewielte Cours déi néideg ministeriell Zoustëmmung huet. Am Zweiwel kann een eng Bestätegung beim Service de la formation des adultes ufroen (E-Mail: nationalite.sfa@men.lu).
Prozedur fir d’Validéierung vu Lëtzebuergesch-Certificaten
Fir sech seng Certificate validéieren ze loossen, muss den Demandeur:
- den Originalcertificat vum Cours;
- eng Enveloppe mat Timber, op där seng Adress steet, fir datt en de Certificat kann zeréckgeschéckt kréien;
zesummen an enger Enveloppe un des Adress schécken:
Ministère de l’Éducation nationale, de l’Enfance et de la Jeunesse
Service de la formation des adultes
Bâtiment Terres Rouges
14, porte de France
L-4360 Esch-Belval
De Certificat kënnt erëm mat engem Stempel, dee bestätegt, datt een e Lëtzebuergeschcours gemaach huet, deen d’Konditiounen, déi am Artikel 28 vum Gesetz vum 8. Mäerz 2017 iwwer d’Lëtzebuerger Nationalitéit festgehale sinn, erfëllt.