Nei Formatioun: 1re DAP – 1 Joer, 1 Beruff

Wärend dengem Formatiounsjoer am Kader vun der 1^re DAP hues du just prakteschen an techneschen Unterrecht. Dank dem Secondairesdiplom oder dem Diplôme de technicien, deen s du schonn an der Täsch hues, bass du vun de Modüllen aus dem Enseignement général vum klasseschen DAP befreit.

Dëse kompakte Programm setzt en intensive Stonneplang viraus. Jee nom Beruff, deen s du léiers, hues du tëschent 35 a 40 Stonnen Unterrecht d’Woch. Esou entwéckels du all déi noutwendeg Kompetenzen, fir däin DAP an engem Joer ofzeschléissen.

Dës Formatioun ass en integrale Bestanddeel vum Lëtzebuerger Schoulsystem. Se gëtt vum Service de la formation professionnelle vum Ministère fir Educatioun, Kanner a Jugend organiséiert.

Niewent der praktescher an technescher Ausbildung an der Schoul gesäit d’Formatioun och Stagephase vir, fir datt s du dech mam Beruffsliewen am Betrib a reelle beruffleche Situatioune vertraut maache kanns.

Den Unterrecht ass a Modüllen agedeelt, déi jeeweils eng Rei kloer definéiert berufflech Kompetenzen ëmfaassen.

D’Evaluatioun an d’Certificatioun entspriechen deene vum klasseschen DAP, dorënner och d’Duerchféiere vun engem Projet intégré final (PIF). Du kriss genee dee selwechten Diplom ewéi no engem klasseschen DAP.

D’Coursë fanne statt:

• an de spezialiséierten Ateliere vum Centre national de formation professionnelle continue (CNFPC) zu Esch/Uelzecht fir follgend Formatiounen:
  • 1^re DAP Estheticien,
  • 1^re DAP Qualifizéierte Gestionnaire an der Logistik,
  • 1^re DAP Zerspanungsmechaniker,
  • 1^re DAP Schräiner,
• am CNFPC zu Ettelbréck fir follgend Formatiounen:
  • 1^re DAP Kach,
  • 1^re DAP Pâtissier-Chocolatier-Confiseur-Glacier,
• an am Lycée technique agricole zu Gilsdref fir d’1^re DAP Bamschoul- a Landschaftsgäertner.

D’1^re DAP suivéiert am Prinzip de Schoulkanner, d’Coursë ginn also vum 15. September bis de 15. Juli.

D’1^re DAP ass eng Vollzäit-Beruffsausbildung am Lycée ouni Contrat d’apprentissage. D’Schüler kréien also keng Ausbildungsentschiedegung.

Ausserdeem ass d’1^re DAP Deel vun der berufflecher Éischtausbildung an zielt net zum Enseignement supérieur. Dowéinst huet een dann och net d’Recht op eng Studiebäihëllef vum Staat.

Fir Jonker bis 25 Joer kënnen d’Elteren allerdéngs ënnert bestëmmte Konditioune weiderhi Kannergeld kréien.

Fir den Accès op eng 1^re DAP musse verschidde Konditiounen erfëllt sinn:

• Titulaire vun engem lëtzebuergeschen Diplôme de fin d’études secondaires vum Enseignement secondaire classique oder vum Enseignement secondaire général, engem Diplôme de technicien oder engem gläichwäertegen Ofschloss (Bac international, Bac européen, A-levels usw.) sinn;
• immens motivéiert fir de gewielte Beruff sinn;
• déi néideg Fäegkeete fir den Ofschloss vun enger intensiver Formatioun matbréngen.

Jee no Ausbildung kann een Auswielverfaren op Basis vum Aschreiwungsdossier an engem perséinleche Gespréich duerchgefouert ginn.

D’1^re DAP riicht sech virun allem u Jonker, déi viru Kuerzem de Secondaire ofgeschloss hunn.

Erwuessener, déi d’Zouloossungskrittären (cf. uewen) erfëllen, kënnen och eng 1^re DAP maachen, virausgesat, et si Plazen disponibel an hire perséinleche Profil entsprécht den Ufuerderungen.

Formatioune gi jee no Beruff op Däitsch a Franséisch oder just op Däitsch ugebueden.

Formatiounen, déi op Däitsch a Franséisch offréiert ginn:

• 1^re DAP Estheticien
• 1^re DAP Qualifizéierte Gestionnaire an der Logistik
• 1^re DAP Schräiner
• 1^re DAP Kach
• 1^re DAP Pâtissier – Chocolatier – Confiseur – Glacier

Ausbildungen, déi nëmmen op Däitsch ugebuede ginn:

• 1^re DAP Zerspanungsmechaniker
• 1^re DAP Bamschoul- a Landschaftsgäertner

Jo, dat aktuellt Angebot ass just den Ufank.

Et ass geplangt, d’Zuel vun de Formatiounen no an no auszebauen, jee no de Besoine vum Aarbechtsmaart an dem Interessi vun de Kandidaten.

D’Bezuelung hänkt vu verschiddene Facteuren of, wéi dem Posten, der Branche, der applizéierter Convention collective an der Politik vum Patron of.

An de meeschte Fäll gëtt deen Diplom, deen en direkte Bezuch zu der jeeweileger Aarbechtsplaz huet, consideréiert. Bei engem Beruff, deen engem DAP entsprécht, gëtt also an der Reegel no dësem Diplom bezuelt.

Fir Schüler, déi hir 1^re DAP net beim éischten Ulaf packen, sief et, well se de Projet intégré final (PIF) net bestan hunn oder well hire Bilan final et hinnen net erlaabt huet, sech beim Projet intégré final am Juni ze presentéieren, si Rattrapagemesurë virgesinn. Dës Schüler hunn zum Beispill d’Méiglechkeet, e Stage oder zousätzlech Coursen ze absolvéieren an hire Projet intégré final wärend der Rattrapagesessioun, déi fir all d’DAPen am Januar vum Joer dono organiséiert gëtt, duerchzeféieren.

Wann s du un enger 1^re-DAP-Formatioun interesséiert bass oder weider Informatioune brauchs, kanns du de Service de la formation professionnelle per E-Mail oder Telefon kontaktéieren:

• E-Mail: premiere-dap@sfp.lu
• Tel.: (+352) 247-36312

Eng Porte-ouverte ass de 7. Juli 2026 am Centre national de formation professionnelle continue (CNFPC) zu Esch/Uelzecht an zu Ettelbréck virgesinn.

Du kanns online eng Preinscriptioun maachen:

• Formular fir d’Preinscriptioun fir d’1^re DAP (op Franséisch)