D’Rechter vum Kand

 

1989 huet d’UNO-Generalversammlung déi international Kannerrechtskonventioun ugeholl. Am Dezember 1993 gouf se vum Lëtzebuerger Parlament ratifizéiert.

Déi international Kannerrechtskonventioun huet sech de Schutz vun de Kanner a Jugendlechen ënner 18 Joer zum Zil gesat. Andeems et dësen Text guttgeheescht huet, huet sech Lëtzebuerg dozou verflicht, d’Rechter, déi an der Konventioun festgehale sinn, ze respektéieren: d’Recht op déi bescht medezinesch Versuergung, Recht op Bildung, Recht op Schutz géint all Form vu Gewalt, Recht op Schutz géint Diskriminéierung, Recht op Schutz vun der Privat- an Intimsphär, Recht op Partizipatioun asw.

Lëtzebuerg huet sech och verflicht, alle Kanner, déi rechtlech ënner seng Zoustännegkeet falen, dës Rechter ze garantéieren, onofhängeg vun hirer nationaler oder sozialer Hierkonft, hirer Hautfaarf, hirem Geschlecht, hirer Sprooch, hirer Relioun, hire Meenungen oder deene vun hiren Elteren.

De Ministère fir Educatioun, Kanner a Jugend këmmert sech ëm d’Ëmsetzung vun dëse Rechter op ministeriellem Plang. Hien hëlt och deel un den Aarbechte vun den zoustännegen internationalen Organismen, wou sech iwwer bewäerte Praktiken ausgetosch gëtt.

Fërderung vun de Kannerrechter

Zu Lëtzebuerg garantéiert den Ombudscomité fir d’Rechter vum Kand (ORK), datt d’Kannerrechter och ëmgesat ginn.

De Ministère implementéiert zousätzlech Initiativen, déi sech un d’Kanner, hir Elteren, d’Fachleit an deem Beräich an d’Allgemengheet riichten, woubäi en op Privatorganisme wéi ECPAT (End Child Prostitution, Child Pornography And Trafficking of children for sexual purposes) zeréckgräift, déi vum Staat kofinanzéiert ginn.

Mam Institut de formation de l’Éducation nationale (IFEN)an anere Bildungszentren (École nationale de l'éducation physique et des sports – ENEPS asw.) assuréiert de Ministère d’Ausbildung vun de Fachkräften am Beräich Kanner a Jugend, wéi déi international Kannerrechtskonventioun dat virgesäit.

Op der Sich no sengen Originnen

De Service des droits de l’enfant garantéiert d'Recherche an D'Demarchen zur Begleedung an Ënnerstëtzung vu Leit, déi hiert biologescht Kand oder hier biologesch Elteren sichen.

Dobäi concertéiert de Service sech mat den nationalen an internationalen Entitéiten a garantéiert dobäi d'Vertrauen an de Schutz vun de perséinlechen Donnéeën.

Schutz vun de Kanner géint Ausbeutung a sexuelle Mëssbrauch

De Ministère fir Educatioun, Kanner a Jugend verfollegt verschidden Initiativen,

  • fir Kanner géint sexuelle Mëssbrauch ze schützen,
  • fir eng méi kannergerecht Unhéierung ze erméiglechen,
  • fir Servicer bereetzestellen, déi sech no engem Mëssbrauch ëm d’Kanner këmmeren.

Zesumme mat den Haaptakteuren (Justizministère, Parquet, Police, Jugendjustiz, SePAS – Service psycho-social et d’accompagnement scolaires, Ombudscomité fir d’Rechter vum Kand, Association luxembourgeoise de pédiatrie sociale, Service médico-scolaire vun der Stad Lëtzebuerg, Ligue médico-sociale), huet de Ministère Richtlinne fir d’Prozeduren ausgeschafft, un déi sech d’Fachleit am Beräich Kanner a Jugend fir de Fall, datt si eppes vun enger Mësshandlung vu Kanner oder Jugendleche matkréien, musseb halen.

An Zesummenaarbecht mat private Vereenegunge wéi z. B. ECPAT, déi vum Staat kofinanzéiert ginn, organiséiert de Ministère preventiv Aktioune fir Kanner an d’Allgemengheet (Dag vun de Kannerrechter am Beetebuerger Park, Ausstellung asw.).

E schafft man Institut de formation de l’Éducation nationale (IFEN) an aneren Ausbildungsinstituter zesummen, fir d’Fachleit am Beräich Kanner a Jugend an d’Prozeduren anzeschaffen, déi anzehale sinn, wann e Fall vu sexuellem Mëssbrauch optaucht.

Am Hibléck op d’Schafung vun engem nationale Kompetenzzentrum am Beräich Mëssbrauch vu Kanner a Jugendleche gëtt eng Zesummenaarbecht mam Parquet, dem Ministère fir bannenzeg Sécherheet, der Direktioun vun der Kriminalpolizei, dem Gesondheetsministère an dem ORK ugestrieft.

D’Modeller vum skandinavesche multidisziplinären Zenter „Barnahus“ an den amerikaneschen „Children’s Advocacy Centres“ sinn an der Diskussioun.

Schutz vun de Kanner géint d’Gefore vum Internet

Am Kader vun den Initiativen, déi d’Kanner géint sexuelle Mëssbrauch a sexuell Gewalt solle schützen, sensibiliséiert de Ministère d’Bierger an d’Fachkräften (Table-ronde, Fachtagung, Referenzplattform) géint d’Geforen am Zesummenhang mat der Notzung vum Internet a virun allem géint de Phänomen vum Grooming.

Vu Grooming schwätzt een, wann eng erwuesse Persoun e Kand kontaktéiert, dacks online an ënner falscher Identitéit, mam Zil, fir et sexuell ze mëssbrauchen oder fir him Suen ofzeknäppen. De Kontakt kann iwwer länger Zäit goen, fir e Vertrauensverhältnis opzebauen an d’Kand herno kënne méi liicht auszenotzen an auszebeuten. Dëst ka verschidde Formen unhuelen: Begéignungen am „richtege Liewen“, mam sexuelle Mëssbrauch als Zil; Opfuerderung, sexuell explizit Biller vu sech ze schécken; Erpressung op Grond vun dësen explizite Biller, fir Suen oder méi Bildmaterial ze kréien.

De Service des droits de l'enfant vum Ministère huet Informatiounen a Rotschléi zu bewäerte Praktiken fir d’Elteren an d’Fachkräften aus dem Erzéiungsberäich zesummegedroen (op Däitsch a Franséisch).

Interministeriell Zesummenaarbecht

D’Kannerrechter falen ënner d’Zoustännegkeet vu verschiddene Ministerien, déi hiert Handelen ënnerteneen ofstëmmen:

  • Ministère fir Educatioun, Kanner a Jugend – Comité interministériel de la jeunesse;
  • Justizministère – Comité interministériel de lutte contre la traite des êtres humains an den Groupe de travail interministériel sur le Centre national d’audition et de thérapie pour enfants – juristesche Volet;
  • Ausseministère – Comité interministériel des droits de l’homme;
  • Ministère fir Chancëgläichheet – Comité interministériel de lutte contre la discrimination des personnes LGBTQI (Lesbian, Gay, Bisexual, Transgender, Queer/Questioning and Intersex);
  • Gesondheetsministère –  Groupe de travail interministériel sur le Centre national d’audition et de thérapie pour enfants, volet examen médical;
  • Sportsministère (Iwwerleeungen zur Implementéierung vu Moossnamen, déi d’Kanner beim Sport géint sexuelle Mëssbrauch solle schützen; Aféierung vun engem betreffende Modul an der Formatioun fir Trainer);
  • Ministère fir Aarbecht (Avis iwwer d’Aarbechtserlaabnes fir Kanner, déi als Acteur bei audio-visuelle Produktioune matmaachen).

Matschaffe bei internationalen Organisatiounen, déi am Beräich vun de Kannerrechter aktiv sinn

 


De Ministère representéiert Lëtzebuerg bei den internationalen Organisatiounen am Kader vum Suivi vun de Konventiounen, déi Lëtzebuerg ratifizéiert huet, a fir ëmmer um leschte Stand ze sinn, wat Entwécklungen a bewäerte Praktiken op internationalem Plang ugeet.

Vereenten Natiounen

  • Koordinatioun vun de periodeschen Äntwerte vu Lëtzebuerg a puncto Kannerrechter, wéi se sech aus der internationaler Kannerrechtskonventioun erginn;
  • Koordinatioun vun de periodeschen Äntwerte vu Lëtzebuerg zu de Fakultativprotokoller, déi sech op déi international Kannerrechtskonventioun bezéien an déi Lëtzebuerg ratifizéiert huet;
  • Mataarbecht bei der Redaktioun vum periodesche Rapport vu Lëtzebuerg (UPR –Universal Periodic Review), d. h. der allgemenger periodescher Iwwerpréifung a senger Verteidegung virun der UNO-Generalversammlung zu Genf;
  • Mataarbecht bei der Redaktioun vum periodesche Rapport vu Lëtzebuerg fir de CEDAW-Rapport (Convention on the Elimination of All Forms of Discrimination Against Women) a senger Verteidegung virun den UNO-Experten zu Genf.
  • Vertriedung vu Lëtzebuerg bei de „Journées de réflexion générale“ vun der UNO.

Europäesch Unioun

  • Vertriedung vu Lëtzebuerg bei der informeller Grupp vun de Kannerrechtskoordinatoren
  • Vertriedung vu Lëtzebuerg am europäesche „Guardianship Network“ (réseau européen de tutelle)
  • vu Kanner a Migratiounssituatioune befaassen.

Europarot

  • Vertriedung vu Lëtzebuerg am Comité des parties à la protection des enfants contre l’exploitation et les abus sexuels
  • Vertriedung vu Lëtzebuerg am Comité ad-hoc des droits de l’enfant.

Nëtzlech Linken

Fërderung vun de Kannerrechter

International Texter a Mise en œuvre

Schutz vun de Kanner géint Ausbeutung a sexuelle Mëssbrauch

Recommandatiounen CM/Rec (2018) 7 vum Comité des ministres du Conseil de l’Europe aux États membres iwwert „Lignes directrices relatives au respect, à la protection et à la réalisation des droits de l’enfant dans l’environnement numérique“

Recommandation CM/Rec (2007)9 du Comité des ministres du Conseil de l’Europe aux États membres sur les projets de en faveur des mineurs migrants non accompagnés

Complementaire Informatiounen

Aktualiséiert