Du hues däin Diplom an der Täsch? Eng nei Etapp an dengem Liewe fänkt un … mee du hues nach kee Plang? Du fills dech nach net prett fir den éischten Job oder d’Uni?
Dann ass Diplom+ genee dat Richtegt fir dech!
Den Diplom+ ass eng Formatioun iwwer dräi Trimesteren, mat där s du zousätzlech Kompetenzen opbaue kanns. Hei drënner fënns du all d’Detailer iwwert d’Formatioun.
Wie kann drun deelhuelen?
Dës Offer ass fir dech, wann s du follgend Konditiounen erfëlls:
- du schaffs net;
- du studéiers net;
- du hues grad den Diplôme de fin d’études secondaires (classiques oder générales), den Diplôme de technicien oder en equivalenten Diplom kritt oder du hues däi Studium ofgebrach an hues wëlles, dech ëmzeorientéieren.
Wat ass mäi Statut wärend der Formatioun?
Du wäerts de Statut vum Schüler hunn.
Wéi leeft d’Formatioun of?
Dauer vun der Formatioun
D’Formatioun dauert dräi Trimesteren:
- Trimester: vum 7. Oktober bis den 22. Dezember 2024;
- Trimester: vum 6. Januar bis den 31. Mäerz 2025;
- Trimester: vum 1. Abrëll bis den 11. Juli 2025.
Déi wéchentlech Dauer ass an der Moyenne 25 Stonnen. Allerdéngs ka si jee no Trimester variéieren.
Inhalt vun der Formatioun
Gemeinsam Modüllen (1. Trimester)
- Berufflech Orientéierung
- Presentatioun a Kommunikatioun
- Virbereedung op d’Aarbechtsliewen
- Éischt Hëllef
- Time & Stress Management
- Project Management
- Practical Life Skills
- Skills for Climate
Pack zur Auswiel (2. Trimester)
- Pack 1: Artisanat – Kachen, Bitzen, Schräinerei
- Pack 2: Design IT – Web Design, Graphic Design, Design & 3D Printing
- Pack 3: Informatik – Coding, Data Analysis, Learning Strategies
Du kanns een eenzege Pack auswielen an dee kanns du wärend der Formatioun net wiesselen!
Praxisprojet (3. Trimester)
De Praxisprojet besteet aus engem Stage an enger Entreprise oder Organisatioun. Duerch de Praxisprojet kanns du Erfarung um Terrain sammelen, wouduerch s du Kompetenzen, déi s du wärend der Formatioun opgebaut hues, weiderentwéckele kanns.
Modalitéite vun der Formatioun
Sprooche vum Cours
- Lëtzebuergesch, Franséisch, Däitsch an Englesch
Modüllen
- D’Modüllen (déi gemeinsam an déi vum Pack) sinn individuell an onofhängeg vuneneen. Si kënne jeeweils 16 bis 24 Stonnen daueren.
- Bei all Modüll gëtt et eng Evaluatioun oder zum Schluss een Test.
Absencen
- Wann s du feels, muss du däi Formateur an d’Ekipp vun Diplom+ den Dag selwer doriwwer informéieren.
- Feels du méi laang, muss du ab dem zweeten Dag Absence eng gëlteg Pièce justificative (zum Beispill een Attest vum Dokter) per E-Mail un diplomplus@men.lu schécken.
Wichteg ze wëssen:
- Du muss mindestens 80 % vun der Zäit pro Modüll present sinn.
- Beim Modüll „Éischt Hëllef“ ass eng Präsenz vun 100 % obligatoresch.
Certificaten
- Fir all erfollegräich ofgeschlossene Modüll kriss du ee Certificat, virausgesat du hues:
- op dʼmannst 80 % vun der Dauer vum jeeweilege Modüll deelgeholl;
- d’Evaluatioun um Enn vum Modüll gepackt.
Ofmeldung
- Du muss dech vun der Formatioun ofmellen, wann s du eng Aarbecht fonnt hues, studéiere gees oder aus soss engem Grond.
- Dofir muss du den Online-Formulaire „Demande de désinscription“ ausfëllen.
- Fir all Modüll, dat s du gepackt hues a wou s du oft genuch präsent wars, kriss du um Enn vum Trimester ee Certificat.
Hues du Froen?
D’Äntwerten op déi am meeschte gestallte Froe fënns du hei drënner an den FAQ.
Du kanns och eng E-Mail un diplomplus@men.lu schécken.
Gëtt een Attest vum Dokter bei der Berechnung vun der Präsenz berücksichtegt?
Nee, just déi Stonnen, wou s du effektiv un der Formatioun deelgeholl hues, gi consideréiert. En Attest vum Dokter zielt net als Ausnam beim Calcul vun der Präsenzpflicht.
Wann ech mat der Formatioun virum Enn vum Programm wëll ophalen, kréien ech dann trotzdeem Certificaten?
Jo, all Modüll gëtt eenzel bewäert a certifiéiert.
Ech géif mech gäre wärend der Formatioun als Demandeur dʼemploi bei der ADEM aschreiwen. Ass dat méiglech?
Nee. Du bass als Schüler beim Ministère fir Educatioun, Kanner a Jugend ageschriwwen.
Hunn ech déi selwecht Rechter op Kannergeld wéi als Schüler?
Jo, d’Ausbezuele vum Kannergeld ka verlängert ginn, wann all d’Konditioune vun der Zukunftskeess erfëllt sinn. Dofir kriss du automatesch Enn Oktober ee Certificat de scolarité geschéckt.
Muss ech mech ofmellen, wann ech eng Aarbecht fonnt hunn, wann ech weider studéieren oder wann ech net mat der Formatioun wëll virufueren?
Jo. DʼOfmellen ass obligatoresch, wann s du virum Enn vum Programm wëlls mat der Formatioun ophalen.
Wat muss ech maachen, fir mech ofzemellen?
Wann s du mat der Formatioun wëlls ophalen, well s du eng Aarbecht fonnt hues, rëm zréck op d’Uni gees oder aus soss engem Grond, muss du dech iwwer den Online-Formulaire „Demande de désinscription“ ofmellen.
Gi wärend der Formatioun Sproochecoursen ugebueden?
Nee, wärend der Formatioun gëtt et kee spezifescht Modüll mat Sproochecoursen.
Kann ech ee Modüll nohuelen, wann ech gefeelt hunn?
Wann s du manner wéi 80 % vun engem Modüll present waars, ka kee Certificat ausgestallt ginn. Et gëtt an dësem Fall keng Méiglechkeet fir e Rattrapage.
