Stéierungen am Beräich vum Héieren, der Sprooch, der motorescher Entwécklung, der Vue oder dem Léiere kënnen de schoulesche Parcours vum Schüler staark beaflossen an der Reussite am Wee stoen. De Minister fir Educatioun, Kanner a Jugend, Claude Meisch, huet den 31. Mäerz 2025 a Presenz vun de Vertrieder vun de Kompetenzzenteren an dem Luxembourg Centre for Educational Testing (LUCET) den Dispositif vun der Fréierkennung vu spezifesche Besoinen zu Lëtzebuerg virgestallt, dee mam Zil, d’Gerechtegkeet an d’Inklusioun ze stäerken, opgestallt gouf. Dësen Dispositif, dee mat zu de performantsten op internationalem Niveau zielt, gëtt elo mat neien Outilen completéiert, déi d’Diagnostik vu spezifesche Léierstéierungen erliichteren an dem multilinguale Kontext vun der Lëtzebuerger Schoulpopulatioun Rechnung droen.
„Mir wëllen esou fréi wéi méiglech potenziell Retarden erkennen, fir all Kand déi Ënnerstëtzung ze bidden, déi et brauch, an et a senger Entwécklung beschtméiglech ze ënnerstëtzen. D’Zil ass et, sou gutt et geet, schoulesch Réckstänn ze vermeiden, déi dem Kand säi Wee kéinten erschwéieren. Wat mir méi fréi méiglech Léier- an Entwécklungsschwieregkeeten erkennen, wat mir méi geziilt a séier kënne reagéieren, fir d’Kanner, hir Familljen an d’Enseignanten ze ënnerstëtzen“, huet de Claude Meisch betount.
Systemateschen Depistage schonn am Cycle 1
Am Kader vun der Fréierkennung intervenéiere verschidde spezialiséiert Kompetenzzentere systematesch an den ëffentleche Schoulen. De Centre de logopédie (CL) intervenéiert am ganze Cycle 1 mat Ekippe vu spezialiséierten Enseignanten an Orthophonisten, fir Kanner mat méiglechen Unzeeche vun enger Héier- oder enger Sproochentwécklungsstéierung ze identifizéieren. De Centre pour le développement moteur (CDM) gesäit alleguer d’Schüler aus dem Cycle 1.2 am Kader vum Depistage vu spezifesche motoresche Stéierungen. De Centre pour le développement des compétences relatives à la vue (CDV) an de LUCET hunn zesummen eng innovativ Demarche am Kader vum Depistage vu Stéierunge vun der Vue entwéckelt. Dës Demarche ass an d’épreuves standardisées (ÉpStan) integréiert, un deenen all d’Schüler vum Cycle 2.1 deelhuelen. Si erlaabt et, Unzeeche vu méigleche Stéierunge vun der Vue ze erkennen, déi dono duerch e spezifeschen Depistage iwwerpréift kënne ginn.
Nei Diagnostik-Instrumenter, ugepasst un de multilinguale Kontext vun der Lëtzebuerger Schoul
Wat d’Diagnostik vu spezifesche Léierstéierungen ugeet – wéi Dyslexie, Dysorthographie oder Dyscalculie – huet de Centre pour le développement des apprentissages Grande-Duchesse Maria Teresa (CDA) bis elo mat Tester geschafft, déi net un de sproochleche Kontext vum Land ugepasst waren. Duerch eng Zesummenaarbecht mam LUCET konnten elo nei Testinstrumenter entwéckelt ginn, déi speziell un de Lëtzebuerger multilinguale Kontext ugepasst sinn. Si erméiglechen eng méi prezis Diagnostik, andeems si tëschent sproochleche Schwieregkeeten – bedéngt duerch de sproochleche Profil vum Kand – an de spezifesche Léierstéierungen ënnerscheeden.
Doriwwer eraus schafft de Ministère och zesumme mam LUCET un der Entwécklung vun engem System, fir Vulnerabilitéiten am Kader vun der mentaler Gesondheet besser ze erkennen, fir esou de betraffene Schüler eng geziilt Ënnerstëtzung ze bidden an hiert mentaalt Wuelbefanne ze stäerken.
