Froen an Äntwerten: Covid-19-Mesuren an de Schoulen an an de Betreiungsstrukturen

Op dëser Säit fannt Dir déi heefegst Froen an Äntwerten zu de Mesuren am Bildungsberäich.

 

Allgemeng Froen

Mäi Kand gouf a Quarantän gesat oder isoléiert: Hunn ech Urecht op de Congé pour raisons familiales am Zesummenhang mat Covid-19?

Wann Äert Kand a Quarantän gesat gouf, well et enke Kontakt mat enger infizéierter Persoun hat, oder wann et isoléiert gouf, well et selwer infizéiert ass, hutt Dir Urecht op de Congé pour raisons familiales am Zesummenhang mam Covid-19.

A béide Fäll ginn déi Deeg, déi Dir fir de Congé pour raisons familiales huelt, net vun deenen Deeg ofgezunn, déi vum Gesetz fir den normale Congé pour raisons familiales virgesi sinn.

Dir kënnt dësen ausseruerdentleche Congé och huelen, wann Äert Kand net an eng Maison relais geet opgrond vun engem positive Fall a senger Schoulklass. Effektiv gëtt an dëser Situatioun (Zenario1) recommandéiert, datt Äert Kand baussent de Schoulzäiten net an d’Maison relais geet.

Weider Froen zu deem Theema fannt Dir ënnert: „Wa mengem Kand seng Klass ofgeschiermt gouf, well e Schüler aus där Klass positiv op Covid-19 getest gouf, däerf mäi Kand dann an d’Maison Relais?“ an „Wat geschitt bei engem eenzege positive Fall an enger Klass?“

De Formulaire fir d’Demande a weider nëtzlech Informatioune fannt Dir op http://guichet.lu/cocrf

Wéi gëtt déi sanitär Strategie am Bildungsberäich suivéiert a kontrolléiert?

En Dispositif „Covid-19 an Educatioun” këmmert sech ëm de Suivi vun der sanitärer Situatioun an ëm d´Decisiounen an deem Kontext. En organiséiert sech ronderëm d’Cellule de coordination vum Educatiounsministère, déi Donnéeën an den Etablissementer vun der Educatioun sammelt, an e Comité de pilotage, dee jee no Situatioun zousätzlech Moossname kann treffen. De Comité de pilotage besteet aus Experte vun der Inspection sanitaire, der Direction de la santé,  der Médecine scolaire, der Direction générale de l’enseignement fondamental, der Direction générale de l’enseignement secondaire an der Verantwortlecher vun der Cellule de coordination.

Wou kann ech Informatiounen iwwer de Coronavirus Covid-19 fannen?

Consultéiert dofir de Site www.covid19.lu. Dir kënnt och dʼHotline 247-65533 uruffen.

Wou kann ech nëtzlech Informatioune fannen?

Dir kënnt Är Froe stellen iwwer de Kontaktformulaire op www.schouldoheem.lu.

Op der Helpline 8002-9090 kritt een allgemeng Informatiounen iwwer d’Moossnamen am Bildungsberäich an et kritt een och pedagogesch Rotschléi. Se ass an der Woch ze erreeche vun 9 bis 12 Auer a vun 13 bis 16 Auer.


Dir kënnt och den Internetsite vum Ministère fir Educatioun, Kanner a Jugend consultéieren.

Ausserdeem hutt Dir dʼMéiglechkeet, dʼAktualitéit op www.covid19.lu an an den nationale Medien ze suivéieren.

 

U wie kann ech mech riichten, wann ech Froen zum Thema Kanner a Jonker mat spezifesche Besoinen oder mat enger Behënnerung hunn?

D’Sozialaarbechter vum „Service de la scolarisation des élèves à besoins spécifiques“ (S-EBS) stinn Iech mat Rot an Dot zur Säit.

Dir erreecht se iwwer d’Nummer 247-85180 oder per E-Mail: social.s-ebs@men.lu.

U wie kann ee sech riichten, wann een Hëllef oder psychologesch Betreiung brauch?

De CePAS (Centre psycho-social et d’accompagnement scolaires) offréiert de Schüler, den Elteren an den Enseignanten och am Kontext vun der Pandemie vum Covid-19 en oppent Ouer, eng Berodung an eng Begleedung:

- iwwer Telefon um 247-75910; 

- a perséinleche Consultatiounen (gratis, nëmmen op Rendez-vous); 

- iwwer Teleconsultatiounen op Ufro.

Mir si fir Iech do vu méindes bis freides, och an de Schoulvakanzen, vun 8:30 Auer bis 12 Auer a vun 13 bis 17 Auer.

Kontakt: Facebook a Messenger: @cepasluxembourg, E-Mail: info@cepas.public.lu, Internetsite: www.cepas.lu.

Wou kann ech online pedagogescht Material an Iddie fir Aktivitéite mat de Kanner fannen?

Den Internetsite www.schouldoheem.lu bréngt Iech bei eng Hellewull vu pedagogeschem Material, dat sech un d’Elteren, un d’Schüler grad ewéi un d’Enseignanten aus der Grondschoul, aus dem Secondaire an aus ville Beräicher vun der Beruffsausbildung riicht.

De Beräich „Kannerdoheem“ proposéiert e sëllegen Aktivitéiten an och spilleresch an ënnerhalsam Iddie fir Kanner tëscht 1 a 4 Joer an tëscht 4 an 12 Joer, déi een doheem oder mat Frënn ka realiséieren. Fir ze iwwerleeën, fir kreativ ze sinn, fir un anerer ze denken, fir a Beweegung ze bleiwen, ouni d’Frënn vum Bastelen ze vergiessen!

Op www.aktivdoheem.lu fannt Dir Rotschléi, fir fit ze ginn oder fir fit ze bleiwen. D’Aktivitéiten decke véier Kategorien of: Eltere mat Kanner, Jugendlecher, Senioren a kleng Kannergruppen.

 

Accueil-Strukturen

Wéi eng Schutzmoossname ginn an de Crèchen a Mini-Crèchë ëmgesat ?

D’Schutzmoossname fir d’Kanner

D’Hännwäsche bleift dee wichtegste Schutzgest. D’Personal sensibiliséiert d’Kanner jee no Alter a weist hinnen déi richteg Gesten.

D’Droe vun enger Mask, engem Bandana (Buff) oder engem Schal fir Kanner ënner zwee Joer ass streng verbueden (Erstéckungsgefor). Bei Kanner ënner 6 Joer, déi esou e Mond-Nues-Schutz schlecht verdroen, gëtt dovun ofgeroden. E kann den Infektiounsrisiko erhéijen, well e Kand reegelméisseg seng Mask a säi Gesiicht mat sengen Hänn beréiert. Extra Consignë (wéi eng Spezialmask unhunn) kënne fir besonnesch ufälleg Kanner gëllen, jee no Uweisung vun hirem Dokter.

D’Aktivitéite sinn esou wäit ewéi méiglech dobaussen. Am Fräie musse Kanner ënner 13 Joer keng Mask unhunn an och keng physesch Distanz anhalen.

Spillsaachen, déi net gebotzt kënne ginn, solle wa méiglech ewechgeluecht ginn.

D’Schutzmoossname fir d’Personal

Ëmmer dann, wann Erwuessener keng tëschemënschlech Distanz vun zwee Meter kënne respektéieren, ass d’Droe vun enger Mask, engem Bandana (Buff) oder engem Schal, dee Mond an Nues bedeckt, recommandéiert. Bei Kontakt zu Leit vu baussen ass et obligatoresch, eng physesch Distanz anzehalen oder eng Mask unzehunn.

Bei de Kanner kann d’Personal sech net stänneg d’Gesiicht bedecken, well d’Kanner de Gesiichtsausdrock musse kënne gesinn.

Déi kierperlech Kontakter mat de Puppelcher gi selbstverständlech bäibehalen. Bei de méi ale Kanner, bleift de Kierperkontakt méiglech an heiansdo och néideg (fir e Kand ze tréischten, fir him ze hëllefen, sech unzedoen, asw.). Den Erwuessene passt drop op, sech d’Hänn ze wäschen an eventuell och d’Gesiicht an dat vum Kand no esou engem physesche Kontakt.

D´Raimlechkeete gi grëndlech gebotzt a reegelméisseg gelëft.

Dës Moossname gëlle fir sämtlech Crèchen a Mini-Crèchen, privater wéi konventionéierter.

Mat wéi eng Moossname gëtt d’Gesondheet vun de Kanner a vum Personal an de Betreiungsstrukture fir scolariséiert Kanner geschützt?

 

D’Aktivitéite ginn esou wäit ewéi méiglech a feste Gruppen organiséiert. D´Gréisst vun engem Grupp ass op 30 Kanner limitéiert an däerf d’Accueilcapacitéit, déi am Agrement festgehale gouf, net iwwerschreiden.

D’Aktivitéite sollen esou vill ewéi méiglech dobausse sinn. Aktivitéite mat Kontakt ginn evitéiert.

Bei de Moolzechte kënne maximal 10 Leit beieneen um selwechten Dësch sëtzen.

Bei Aktivitéiten am feste Grupp gëllt weeder d’Reegel vun der physescher Distanz, nach gëtt et eng Maskeflicht. Bei Kontakt mat anere Gruppen oder ausserhalb vum fixe Grupp sinn d’Reegele vun der physescher Distanz a vum Droe vun enger Mask ze respektéieren. Esou ass et zum Beispill fir jiddereen iwwer 6 Joer obligatoresch, sech am ëffentlechen Transport Nues a Mond ze bedecken. Et gëtt dovun ofgeroden, Kanner ënner 6 Joer eng Mask unzedoen.

D’Kanner an déi Jonk gi sensibiliséiert fir d’Hygièngesreegelen, déi gëllen (sech d’Hänn wäschen, sech begréissen, ouni sech ze beréieren, asw.).

 

D´Raimlechkeete gi grëndlech gebotzt a reegelméisseg gelëft.

Déi Erwuesse kréie geroden, ëmmer dann eng Mask, e Bandana (Buff) oder e Schal iwwer Mond an Nues ze hunn, wann eng tëschemënschlech Distanz vun zwee Meter net kann agehale ginn.

D’Animateure mussen eng Formatioun matgemaach hunn iwwer déi sanitär Reegelen, déi ëmzesetze sinn.

Wa mengem Kand seng Klass ofgeschiermt ass, well ee vu senge Schoulkomerode positiv op de Covid-19 getest gouf, däerf et dann awer an d’Maison relais goen?

Wann eng Klass aus dem Schoulgebai ofgeschiermt ass, gëtt recommandéiert, datt dʼSchüler aus där Klass ausserhalb vun de Schoulzäiten net an dʼMaison relais ginn.

Hunn d’Elteren awer keng Méiglechkeet, d’Kand doheem ze halen, dann ass d’Betreiungsstruktur gehalen, d’Kand unzehuelen an et esou wäit ewéi méiglech ofzeschiermen. Wann d’Kand méi wéi 6 Joer al ass, muss et eng Mask undoen.

Kuckt och hei drënner dʼFro: „Wat geschitt, wann een eenzege positive Fall an der Klass ass?“

Mäi Kand ass nach net scolariséiert a geet an eng Betreiungsstruktur. Do hat et Kontakt mat enger positiver Persoun. Wat geschitt elo?

Dir gitt esou séier wéi méiglech vun der Inspection sanitaire kontaktéiert. Déi decidéiert da Moossnamen, déi der Situatioun ugepasst sinn. An der Tëschenzäit gëtt geroden, datt dʼKand eng Mask undeet, wann et méi wéi 6 Joer huet.

Grondschoul an Enseignement secondaire

Wat fir sanitär Mesurë gi fir d’Rentrée 2020-2021 geholl?

Fir d’Ustiechungsgefor an de Schoulen esou niddereg ewéi méiglech ze halen, ginn déi néideg sanitär Mesurë bäibehalen:

Am Klassesall:

-          d’Beweegungsfräiheet vun de Schüler ass ageschränkt;

-          all Schüler huet eng fix Plaz;

-          reegelméissegt Lëften am Respekt vun der Sécherheet vun de Schüler (kuckt och de Punkt 3.3. an den Uweisunge fir dʼPersonal aus der Grondschoul an de Punkt 3.2. an den Uweisunge fir dʼPersonal aus dem Enseignement secondaire),

-          d’Uewerfläche gi reegelméisseg gebotzt;

-          d’Hännwäsche gëtt intensivéiert (d'Hänn gi virun de Schoulstonnen gewäsch, no all Paus, nodeems een op d´Toilette war, vir an no de Moolzechten);

-          d’Hygiènesreegele gëllen (an den Ielebou houschten an néitsen, sech net beréieren (sech begréissen, ouni sech ze beréieren, asw.).

 

Um Schoulcampus:

-          dʼDroe vun engem Mask (cf. d’Fro hei ënnendrënner);

-          d’Pause sinn decaléiert;

-          déi sanitär Espacë gi reegelméisseg gebotzt;

-          ausserhalb vun der Klass ginn d’Kontakter reduzéiert;

-          d’Zirkuléieren um Campus gëtt gereegelt.

An de Lycéeë kënnen zousätzlech Mesurë geholl ginn, wéi zum Beispill dat obligatorescht Droe vun engem Mask am Klassesall oder d’Organisatioun vun de Coursen am Wiesselrhythmus (z. B. op zwou Wochen ass eng Woch am Presentiel).

Muss mäi Kand e Mask an der Schoul droen?

D’Droe vun engem Mask (oder all anerem Dispositif, fir d´Nues an de Mond ze bedecken) ass fir Kanner ënner zwee Joer verbueden a bei Kanner ënner 6 Joer gëtt dovun ofgeroden.

Fir d’Kanner iwwer 6 Joer ass d´Droe vun engem Mask um Schoulwee a bannent dem Schoulgebai obligatoresch.  An der Grondschoul ass d’Droe vun engem Mask am Klassesall an am Schoulhaff fakultativ.  Am Enseignement secondaire ass am Schoulhaff Maskeflicht. D´Lycéeë kënnen eng Maskeflicht am Klassesall imposéieren.

Muss mäi Kand an den ëffentlechen Transporter e Mask droen?

D’Kanner, déi méi al si wéi 6 Joer an déi Jonk mussen an den ëffentlechen a schouleschen Transporter e Mask droen.

Wäerten d’Turn- a Schwammstonne stattfannen?

D ’ Turn- a Schwammstonne ginn, ënner Schutzmoossnamen, erëm ugebueden:
- d’Aktivitéiten am Fräie gi privilegéiert;
- um Wee, an de Vestiären a bis datt d’Aktivitéit ugeet mussen all déi, déi méi al sinn ewéi 6 Joer, e Mask droen;
- d’Hänn musse virun an no de Coursë gewäsch ginn.

Wärend der sportlecher Aktivitéit ass et net néideg, datt d’Maske gedroe ginn.

Hunn d´Schoulkantinnen nees op?

D´Kantinne maachen hir Diere bei der Rentrée, ënner Schutzmoossnamen, nees op:
- D´Maske ginn um Wee ugedoen, bis een op senger Plaz sëtzt;
- maximal 10 Leit pro Dësch;
- d’Hänn gi virun an no der Moolzecht gewäsch;
- Buffeten am Selfservice si verbueden;
- am Enseignement secondaire gi weiderhin d’„Frupstuten” ugebueden: D’Schüler kënnen dann an hirem Klassesall iessen, wa se net zu méi ewéi 10 Persounen am Sall sinn.

Kënnen ausserschoulesch Aktivitéiten nees stattfannen?

Dagesausflich vun der Klass sinn erlaabt, wa se hei am Land sinn a se bei en Déngschtleeschter féiert, deen e sanitäre Konzept hutt. D´Droe vum Mask ass recommandéiert.

Wat geschitt bei engem eenzege positive Fall an enger Klass no enger Ustiechung baussent der Schoul?

Déi positiv Persoun gëtt doheem isoléiert.

Déi concernéiert Klass gëtt vun den anere Klassen ofgeschiermt. Si gëtt net a Quarantän gesat.

DʼPersounen, déi an der Schoul mat där Persoun, déi positiv getest gouf, a Kontakt waren, ginn identifizéiert (Contacttracing). DʼSchüler an dʼEnseignantë kréie vun der Santés-Direktioun eng Ordonnance, fir sech testen ze loossen, fréistens 6 Deeg nom leschte Kontakt mam positive Fall.

Fir dʼSchüler, déi méi al si wéi 6 Joer, a fir dʼEnseignanten ass et obligatoresch, eng Mask ze droen an zwar wärend de sechs Deeg nom leschte Kontakt mat der positiv getester Persoun an och an der Phas, an där se getest ginn.

DʼSchüler, déi keng aner Méiglechkeet hunn, fir an d’Schoul ze kommen, kënne weider de Schülertransport benotzen, musse sech awer un dʼMaskeflicht halen.

Et gëtt de concernéierte Schüler an Enseignanten och geroden, hir sozial Kontakter baussent der Schoul ze reduzéieren, esou laang d’Klass ofgeschiermt gëtt.

DʼSchüler déi keng aner Méiglechkeet hunn an d’Schoul ze kommen, kënne weider de Schülertransport benotzen, musse sech awer un dʼMaskeflicht halen. D’Ofschiermen ass automatesch den aachten Dag nom leschte Kontakt mat der positiv getester Persoun eriwwer.

Dir hutt Urecht op en aussergewéinleche Congé pour raisons familiales am Kontext vum Covid-19, fir op Äert Kand baussent de Schoulstonnen opzepassen.

Wat geschitt, wann e puer positiv Fäll an enger Klass vun enger Schoul sinn?

Déi positiv Persoune ginn doheem isoléiert.
D’Persounen, déi an der Schoul mat deene Persounen, déi positiv getest gouf, a Kontakt waren, ginn identifizéiert (contact tracing).
D’Klass gëtt a Quarantän gesat, bis en negatiivt Testresultat virläit.
D’Enseignanten, déi d’Geste-barrièrë respektéiert hunn, ginn net a Quarantän gesat.
 

Wat geschitt, wann eng Infektiounschaîne an der Schoul vu mengem Kand ass?

Wann e puer Persounen aus enger Schoul ugestach goufen, kënnen op Propositioun vum Comité de pilotage “Covid-19 an Educatioun” (Experte vum Ministère de la Santé a vum Educatiounsministère) zousätzlech Moossnamen ergraff ginn. Dës Mesurë kënne verschiddenaarteg sinn a gi jee no Situatioun vum Ministère de la Santé oder dem Educatiounsministère geholl.

Et handelt sech ëm:
- den Testing vun engem groussen Deel oder der ganzer Schoulgemeinschaft;
- dat obligatorescht Droe vun engem Mask am Klassesall;
- d´Quarantän fir méi Klassen oder och déi ganz Schoulgemeinschaft;
- d’Ofsoe vu verschiddenen Aktivitéiten (Ausflich, asw.);
- en temporären Enseignement à distance fir verschidde Klassen oder fir all d’Klassen;
- d’Späre vu Raim, an deenen ee sech treffe kann (Kantinnen, Bibliothéiken, asw.)

Gëtt mäi Kand reegelméisseg getest?

Äert Kand ka gefrot ginn, fir bei engem Large Scaling Testing (wéi deen, deen uganks September 2020 stattfënnt) matzemaachen. Et ka getest ginn, wann a senger Klass oder a senger Schoul een oder méi positiv Fäll sinn.

Wat geschitt mat Enseignanten a mat Schüler, déi vulnerabel sinn?

Ären Dokter muss e Certificat ausstellen, op deem vermierkt ass, datt Äert Kand vulnerabel ass.
D’Léierpersonal stellt dat néidegt Material fir den Unterrecht op Distanz zur Verfügung; donieft fënnt een och didaktescht Material op www.schouldoheem.lu

D’Enseignantë kréie vun hirem Dokter e Certificat de vulnérabilité ausgestallt, dee vum Aarbechtsdokter validéiert gëtt. Si halen hir Coursen ënner de Modalitéiten, déi mat hirem Direkter oder mam Direkter vun der Regioun zeréckbehale goufen.

Mäi Kand huet Symptomer: Wat soll ech maachen?

Äert Kand muss doheembleiwen, wann et krank ass oder wann et déi heiten Symptomer huet:

Entweeder eent vun deenen Haaptsymptomer: Féiwer, Houscht, Otemproblemer, Péng am Longeberäich, Verloscht vum Geschmaachs- a Gerochsënn ouni erkennbar Ursaach

ODER

minimum zwee vun deenen Niewesymptomer: Péng an de Muskelen; Middegkeet; Schnapp (Nues, déi verstoppt ass oder leeft); Halswéi; Kappwéi; keen Appetit; wässeregen Duerchfall.

Wann der en Zweiwel hutt, musst Dir Äert Kand doheem halen an Ären Dokter kontaktéieren.

Ass den Enseignement à distance (Schoul doheem) definitiv eriwwer?

Den Enseignement à distance gëtt bäibehale fir vulnerabel Persounen (Schüler a Léierpersonal) a fir d’Klassen, déi a Quarantän sinn. Dat didaktescht Material gëtt zur Verfügung gestallt op www.schoudoheem.lu.

 

 

Beruffsausbildung

Gëtt den Delai, fir de Léierkontrakt ze ënnerschreiwen, verlängert?

De leschten Datum, fir de Léierkontrakt ze ënnerschreiwen (ursprénglech den 31. Oktober), gëtt op den 31. Dezember 2020 verréckelt fir d’Schüler, déi hir Beruffsausbildung am „Régime concomitant“ maachen (also am zweegleisege System mat engem Deel vum Unterrecht an der Entreprise an deem aneren Deel an engem Lycée).

 

Däerf e Léierjong oder e Léiermeedchen, deem seng Klass wéinst engem isoléierte positive Fall ofgeschiermt gëtt, a säin Ausbildungsbetrib (Entreprise formatrice) goen?

Wann et zu engem isoléierte positive Fall an enger Klass kënnt, informéiert de Lycée den Ausbildungsbetrib.

Wann dʼEntreprise net ka garantéieren, datt de Léierjong oder dʼLéiermeedche stänneg eng Mask unhuet an och déi sozial Kontakter limitéiert ginn, da kritt dʼEntreprise geroden, de Schüler oder dʼSchülerin ze dispenséieren, esou laang wéi dʼKlass ofgeschiermt gëtt.

 

Erwuessenebildung

Wéi kritt een Informatiounen a Rotschléi iwwer dʼErwuessenebildung?

Dir kënnt Kontakt ophuele mam „Service de la formation des adultes“ entweeder iwwer Telefon um 8002-4488 oder per E-Mail op sfa@men.lu.

Wann et néideg ass, kann och e Rendez-vous mat engem Conseiller an der Erwuessenebildung um Site Kierchbierg ausgemaach ginn

Vu Visitten ouni Rendez-vous gëtt ofgeroden.

 

Aktualiséiert